رميتي الدبلة في وشه

 رميتي الدبلة في وشة !! كتب الكتاب كمان أسبوع أعقلي يا دنيا !!
بقولك ضړبني ضړبني وإحنا مخطوبين أمال لما نبقى في بيت واحد هيعمل فيا أي!!
طب والشقة إلي خلصت والقاعة والناس !!
بكيت بشدة وأنا برد عليها 
بقولك مد إيده عليا تقوليلي شقه وناس !
بصيت في عنيها ملقتش فيهم غير الشدة فكملت وأتمنيت تحن عليا
هو أنا رخيصة عندك أوي كدا يا ماما !!
شفتها أخدت نفس عميق وجت قعدت جنبي ومسكت إيدي نبرتها كانت هادية وهي بتردد 
أنت أغلى حاجة في عمري يا قلب أمك دا أنا عمري كله ضيعته عليك 
بصيتلها پألم
ضيعتي عمرك عليا عشان تسلميني لواحد يبهدلني يا ماما!

أهدي وأسمعيني كويس وحطي كلامي دا حلقة في ودنك كل الستات بتنضرب مفيش واحدة ست جوزها مامدش إيده عليها 
بصيتلها بغرابة من وسط دموعي فكملت 
أسمعي كلام أمك مش أنا إلي مربياك ومعلماك كل حاجة اشتري مني الست مننا لازم تكون مطيعة لجوزها وتسمع كلامه كويس ودا بيضمنلها تعيش بكرامة واحترام طول ما خطواتها محسوبة وواخده بالها من البيت والعيال يبقى تتشال على الراس وطول ما هي بتغلط يبقى تستحق الضړب والعقاپ دا الحق يا دنيا 
سألت بتهكم شديد
دا الحق!
اه طبعا الحق وهي الست محتاجة أي في الدنيا غير راجل يفهمها الصح من الغلط ويعاقبها كمان عشان ميطلعش منها العيبة ما أنت لازم تفهمي إن الست في وش جوزها
بصيت لها بغرابة أكبر المرة دي فكملت
أه يحبيبتي في وش جوزها ما هي أما تغلط يبقى العيب على جوزها إلي مش عارف يشكمها ولا يحكمها 
ماما سيبيني لوحدي
بصتلي وابتسمت وهي بتمسع دموعي
هسيبك تتأني وتفكري وتعقلي كلام أمك ومن غير عياط !!
ابتسمت بتهكم وأنا شيفاها بتطلع برا مستوعبتش حرف من إلي قالته هو الطبيعي إن الراجل بيتجوز الست عشان يربيها! ولو عملت غلط هيبقى في وشه
من أمتى احترام وكرامة الست مشروطة بطاعة جوزها
دماغي مش قادرة تقبل دا وقلبي موجوع من الراجل إلي المفروض هقضي معاه حياتي 
لبست حاجة بكم تغطي دراعي إلي مليان كدمات وطلعت للبلكونة في الهوا في محاولة مني أن دماغي تهدى شوية 
افتكرت كل حاجة وأولهم اليوم إلي أعترف فيه بحبه
افتكرت نظرته الدايبة ونبرته المتوترة وهو بيتكلم وقتها 
أنا وقعت في حبك يا دنيا 
ساعتها مردتش عليه فكمل 
حبيتك من غير ما أحسبها فجأة لقيت نفسي مش قادر أبعد عنك كل حياتي بتدور حواليك لقيت نفسي بخطط وبعمل حساب مستقبل إنت موجودة فيه ومش متخيله من غيرك 
سكت للحظة حسيت فيها بإرتباك الدنيا كله إلي زاد أكتر لما نطق بصوت مهزوز 
دنيا تتجوزيني !
حسيت إن الدنيا مش سيعاني وقتها وكأن الدنيا ضحكت في وشي فجأة حسيت أني هطير ومن ارتباكي وقتها مديتهوش رد كلم بابا وكل حاجة كانت مثالية كل حاجة كانت حلوة لدرجة لدرجة خدت قلبي 
إزاي ممكن يكون حبني 
هو في حب بيأذي ويبهدل صاحبه كدا
أنا بس إتأخرت نص ساعة هي نص ساعة تأخير تغير مشاعر بني آدم ولا مكانش فيه مشاعر أصلا !!
دموعي بدأت تنزل وأنا بفتكر إلي حصل إمبارح كان عندنا معاد عشان نعمل بروڤا لفستان الفرح وهو أصر يجي معايا عشان لو الفستان معجبهوش نعدل فيه 
أنا بس أتأخرت نص ساعة ولما وصلتله ودخلت العربية مكنتش متوقعة ولا مستوعبة إلي عمله 
ضړبني ضړبني بغباء وغل مكنتش فهماه ولحد حالا مش فهمهاه صړخت كتير يمكن حد يلحقني من الشارع لكن محدش اتحرك محسيتش بنفسي غير وأنا رامية الدبلة في
وشة طلعت أجري في الشوارع